Þá er komið að því að setja inn eina blogg færslu eða svo. Það er ágætt að fá athugasemdir um bloggleysi í athugasemdakerfið frá Ása á Stórutjörnum. Þá veit maður að einhver er að fylgjast með. :o)

Í byrjun nóvember færðum við þjálfunarhrossin okkar úr póstnúmeri 640 yfir í 641, nánar tiltekið í Torfunes. Þar leigjum við hjá Didda pláss fyrir 5 hross og verður að segjast að það er frábært að geta unnið með hrossin í þeirri frábæru aðstöðu sem þar er búið að byggja upp. Svo maður tali nú ekki um að geta þjálfað í hvaða veðri sem er í reiðhöllinni. Það verður að segjast að Traðagerði hentar mjög illa þeim hrossum sem stefnt er með í kynbótadóm.

Þau hross sem eru í Torfunesi eru í aldursröð HraunarOrrason, Hella Rökkvadóttir, Hrauney Aronsdóttir, Freyja Klettsdóttir og Stuðlar DraumsAronsson. Stuðlar er yngstur þeirra á fjórða vetur. Hann fer vel af stað og ljóst að það verður stutt að sækja töltið þegar að því kemur. Einnig gengur vel með hinar merarnar og er stefnt með öll fjögur í dóm í vor. Ég mun setja inn myndir þegar veður gefst til að taka upp.

Annars er það að frétta af reiðhöll Grana og Þjálfa í Saltvík að það styttist í að hún verði hæf til brúkunar. Vinnukvöld var tekið 8 desember síðastliðinn þar sem upp voru settir battar og festingar á veggi til að hengja hross á. Hér að neðan eru tvær myndir frá því kvöldi.

Svo að lokum smá myndband sem ég setti saman þegar Stuðlari var sleppt í merar 15. júní í sumar. Það vantar ekki orkuna og gleðina að komast í slíkan lúxus. Alls voru 10 merar staðfestar með fyli frá honum sumar og verður gaman að sjá útkomuna næsta vor.