Hér hafa þátttakendur stillt sér upp að loknu reiðnámskeiði hjá Alberti Jónssyni 1982(?). Albert var einn mesti reiðsnillingur Íslands á sínum tíma. Hann þjálfaði meðal annars Náttfara frá Ytra-Dalsgerði og sýndi son hans Eldjárn frá Hvassafelli. Albert bjó í Svarfaðadal á þessum tíma og þjálfaði þar meðal annars Hervar frá Sauðárkróki og Vöku frá Brennigerði sem hann og sýndi 1981 og var hún hæst dæmda kynbótahross landsins það árið.

Frá vinstri talið: Albert Jónsson, Pálmi Pálmason á hesti frá Kúfhóli, Stefán Haraldsson á Hrana frá Kirkjubæ, Ingólfur Jónsson á Tvisti, Gísli Haraldsson á Drottningu Hrafnsdóttur 802 frá Glæsibæ, öðlingurinn Magnús heitinn Bjarnason á Ljúf, Þórður Adamsson á Skyldi og Ásberg Salómonsson á Litla-Rauð.

Síðustu helgina í janúar fór ég norður til að hlaða batteríin og fara á hestbak að sjálfsögðu. Myndavélin fylgdi með. Hér að ofan er hún Hella Rökkvadóttir. Þjálfun gengur vel og stefnt er með hana á landsmót á Vindheimamelum í sumar. Byggingarþátturinn er smá spurningarmerki hjá henni en ljóst er að hæfileikarnir eru til staðar. Hægt er að sjá nánar um hana í valmyndinni undir hross í þjálfun.

Öllu rólegar er farið af stað með Hrauney. Hún virðist ekki kippa sér upp við nokkurn skapaðann hlut. Aðeins hefur verið farið á bak á hana inni í hringgerði og hefur það gengið vel. Þjálfun fer rólega af stað og verður bara að koma í ljós hvort hægt verði að koma henni í kynbótadóm í sumar.
Við kíktum einnig á útiganginn í Saltvík. Þar eru Hrauna, Bjarklind og Frigg með sín folöld síðan í sumar. Það er gaman að sjá hvernig folöldin hafa dafnað. Iðunn sem er undan Frigg er stærðar meri. Hún er að vísu fædd snemma sumars en faðir hennar Týr frá Skeiðháholti er stærðar hestur, 144 á herðar. Einnig virðist Herðubreið sem er fædd í lok júlí og er undan Hraunu ætla að verða stærðar meri en á myndinni hér til hliðar má sjá þær mæðgur. Björk Möllersdóttir sem er undan Bjarklind er mjög lítil en hún er fædd mjög seint í ágúst. Vonandi tekur hún vaxtarkipp í sumar. Ljóst er að bleikálótti liturinn ætlar að verða ráðandi í ræktuninni okkar. Þrjú af fjórum afkvæmum Hraunu eru bleikálótt og svo Björk einnig sem er undan Bjarklind. Hægt er að sjá nánar um öll ofangreind hross í valmyndinni hér að ofan undir ræktunarhryssur og folöld.

Hægt er að sjá fleiri myndir í myndaalbúmi.

Frigg, Iðunn, Ösp, Herðubreið og Björk